【轉妹家】曾雪蓉原作

【轉妹家】曾雪蓉原作
「羊咩咩,十兪歲,坐火車,轉妹家,兩斗米,打粢粑,無糖
好搵搵泥沙。」這係𠊎還細時節,同該兜細人仔輒常會念个童謠
該央時个𠊎,當然毋知轉妹家係麼个味緒?毋過逐擺看著叔伯阿姊
總係歡喜喜轉屋下,又係目汁濫泔个離開妹家,𠊎還較分毋清
轉妹家到底係快樂抑係傷心 ? 一直到自家變成爺哀妹仔賊,𠊎
正知轉妹家就有一種又歡喜毋盼得个心情。
𠊎係吾屋下吊尾錘,人講:「滿女滿嬌嬌,屙尿愛人兜。」
𠊎正經阿爸縱到嬌尸撥撥,雖然阿姆也當惜𠊎,總聽人講:「爺
惜大,娘惜尾滿。」毋過𠊎係繫在阿爸褲頭項跈等去逛街个,
也係坐在阿爸膝頭頂聽佢講古聽大个,故所𠊎黏阿爸時間顛倒
較長,雖然恁樣阿姆有成時也會匧𠊎,講𠊎淨係阿爸妹仔
定。到𠊎愛嫁人該日阿爸講麼个,就目珠紅紅,一下仔摸吾个
頭那毛,一下仔揢緪吾个手,𠊎摸著阿爸个手,燒熝熝仔,係一種
實在又溫暖感覺
吾妹家離𠊎歇个所在盡遠故所𠊎一年正轉去兩三擺仔定定
逐擺轉去个時節阿爸總會兜一張凳仔坐在門前等𠊎,一看著𠊎就
講:「恁會擇,擇該麼个日仔毋係發風落雨就係三更半夜,下二
擺𠊎無愛等你哩!」。等𠊎愛離開屋下該下阿爸強強愛將屋肚
傢伙全部搬到吾个車頂,搬一項念一句:「妹仔正經妹仔賊。」
毋過佢面項个笑容,同人講恁歡喜又恁滿足。
恁多年過忒,𠊎早就慣吔,看阿爸兜一張凳仔坐在門前等𠊎,
試著該係大自然最靚个一幅風景。
一直到舊年阿爸過身,𠊎轉到屋下看毋著阿爸个身影,摸
毋著阿爸燒熝熝仔个手,淨伸著一張冷冷个凳仔在該搖啊搖,𠊎正
相信阿爸既經毋在哩。
這下不管有幾無閒,𠊎總會時間拚轉妹家,因為𠊎毋盼得
姆,因為「千跪萬拜一爐香,毋當還生一碗湯。」
阿姆阿爸過身以後,就「老人成細子」,越來越像細人仔
看著𠊎就會講:「你仰無唚𠊎呢?」𠊎煞煞阿姆瘦夾夾个圓身
揇緪緪;𠊎試著自家還幸福,因為還有得人惜阿姆好惜。
這下,對𠊎來講,不管阿爸還在抑係毋在,妹家係𠊎這妹仔
想著就有笑容个地方;妹家就係妹仔感覺溫暖位所;妹家總
妹仔心肝頭永久做得偎凴所在;「轉妹家」就係𠊎又歡喜
毋盼得時節

發表迴響

你的電子郵件位址並不會被公開。 必要欄位標記為 *