【煨番薯】彭瑞珠原作

煨番薯】彭瑞珠原作
行入便利商店,偎壁脣个箱仔項有燒燒焙好个番薯。烏色卵石頂焙等香香个番薯,番薯皮熇到燥爽燥爽、㪐核㪐核 ,番薯个糖膏對番薯皮个縫仔項凝 出來了,還餳人食哪!看到人忍毋核當下就買兩條,趕燒食落肚,還幸福个味緒哪!
細人仔該下寒天臨暗頭姐公洗好身會在廳下看電視、焙厥燒熝熝仔个火囪姐婆灶下洗身水,𠊎就在灶空前掌等灶空壁角个番薯,細心細意个摎番薯埋在火屎肚壅等,看顧等佢、莫分火燒著姐婆洗好身,噴香个番薯也煨好了。囥入姐婆間房扐等姐婆用大手帕包好个水鴨嫲 ,食等甜香煨好个番薯,看阿婆髻鬃花、聽阿婆講古,係寒天臨暗頭盡幸福个味緒
有一年暑假,禾頭田割忒了,田項个泥翻好、還吂放水,大哥渡等歸陣仔老弟老妹阿公田項煨番薯兩兄弟窟仔、疊泥團,搣好一隻番薯窯;五姊妹團草結 、撿樵準備起火。火起起來了,大哥講佢來疊樵、𠊎兜去尞就做得,火燒到猛猛猛,大哥就係大哥!六個老弟老妹在田坵肚打嘴鼓、唱歌仔、走相逐仔、搣射蟲𧊅。大火過,出火炭了,放入盡平心盡惜孫仔阿婆擇過个一條條仔平大平大、靚靚个番薯,封口、等番薯熟。二哥看火煙在泥團縫項蓬蓬起,拿起挖泥个鏟仔摎泥團撳拶,還對窯頂撳幾下下,一息煙都無出了!大家先轉屋,等番薯翕熟。時間差毋多了,俚來去開窯了。還慶哦,番薯全部都有熟透心、乜無一條臭火煙堵好熟、又略略仔糖膏个番薯,實在有罅香!毋過全部都係扁个,可見二貨仔个鏟仔,異有力,連九十歲个阿太看著大號老蘿蔔樣仔个番薯都好笑!毋過,該窯扁扁煨好个番薯,有𠊎俚兄弟姊妹仔一生人感情个記念。
看著煨番薯,會看著姐婆燒暖灶下、會看著田坵肚一大陣兄弟姊妹仔个嘻嘻㖸㖸,對𠊎來講,係幸福个味緒看著煨番薯,異多老人家想起空襲時代个番薯簽、會想起鮮鮮湯湯个糜飲燒熝熝仔、香出味个白飯,對佢兜來講,正係幸福个味緒。該對您來講,哪項食雜,囥等有您幸福个記號,有您幸福个味緒呢?

發表迴響

你的電子郵件位址並不會被公開。 必要欄位標記為 *