【火雞咕嚕咕嚕】劉玉蕉原作

火雞咕嚕咕嚕】劉玉蕉原作
「咕嚕,咕嚕」園肚个火雞看著𠊎這兜細孲仔,撐開像扇
仔个尾翼,兩隻腳踢啊踢行等過來,緊行喉嗹還「咕嚕,咕嚕」
緊叫,下頷該垤紅色皺皮,跈等叫聲顫顫掣掣,看著實在得人畏
!分毋清佢係歡迎𠊎這兜,抑係抗議𠊎兜忒吵,看佢恁仔面紅紅
,眼視視,尖尖个觜又像關刀,隨時愛劈過來个樣相,這勢面,
𠊎看莫惹佢有較贏
記得該年,轉姐婆屋下,一下車,無等阿爸阿姆擐好等路
,就衝等入伙房屋去尋姐婆姐婆無尋著,嗄來惹著屋角歇睏
兩隻大火雞,緊恅著阿婆畜个該隻烏狗共樣,恁溫馴,鼻得出
吾个味緒,就無加注意,無想著火雞「咕嚕,咕嚕」就拂等來
哩,兩隻大火雞齊齊對𠊎飆過來,正看著佢兜下頷个紅肉,晃啊
晃,一斡頭屎朏就畀觜著吔,「阿姆哀唷~!」𠊎拚等走往出,
吂知該火雞看𠊎好欺負,也逐等來,「媽~」𠊎放聲噭,喊阿姆,
阿爸地泥下挱著一枝竹仔,就𢫦過去,兩隻火雞「咕嚕,咕嚕
」真毋甘願樣仔,眼視視仔,走到牆頭脣,尖尖个觜還「咕嚕
,咕嚕」叫無停
屋背做事个姐婆,聽著𠊎賠命个噭聲,走出來看著光景
遽遽同𠊎揇緪緪講:「毋使驚,毋使驚,該頭牲仔得哩!」還講
:「這火雞夭壽,敢拂吾孫女,天光來同佢㓾忒分你食!」緊講
緊笑,乜毋知佢係正經譴抑係詐意仔譴。該央時个𠊎,總知講該
兩隻火雞死該哩!
該擺事件過後,𠊎見看著火雞,心肝肚就先驚便,閃佢
閃到遠遠,今晡日跈先生來休閒農場遶尞,遠遠看著火雞,還係
一隻「驚」字,屎朏挲啊挲仔,該年个驚險一幕,就像昨晡日
發生樣仔。驚佢又過恬恬拂啊來,𠊎毋敢行兼,毋過,這園肚
火雞啊,分人跼等,少忒該雄頭,顛倒試著佢兜異衰過,就像
這兜細孲仔共樣天闊地闊任在你飆,幾成歡喜噫;係講同你
跼在屋肚麼个做毋得,你會仰般

發表迴響

你的電子郵件位址並不會被公開。 必要欄位標記為 *