【阿姆个手路菜】鄒瑞梅原作

頭擺个人,生活盡簡單乜盡艱苦細人仔想愛食東西,就會想著灶下想著灶下,就會想著阿姆手路菜。阿姆當煞猛逐日天吂光就行入灶下煮食阿姆煮个番薯粥一等好食,桌頂菜脯卵、番豆還有阿姆自家滷个醃瓜仔老嫩大細圍圍共下食飯當鬧熱尤其係正、二月仔冷颼颼个天時做得食著燒熝熝仔个番薯粥,實在當幸福。記得有一日,𠊎在學校轉來个時節,遠遠就鼻著雞酒味,吾腳步嗄越行越遽,三步做兩步行遽遽行入灶下阿姆看著𠊎就笑咪咪仔同𠊎講:「昨晡日隔壁个秀蘭阿姨降倈仔做月愛食雞酒,身體正會好,阿姆㓾一隻大閹雞煮雞酒同佢補身體。」哈!看得著毋著,害𠊎走到恁煞猛。阿姆笑𠊎講:「食飯打赤膊,做事尋衫著。」續等講:「有啦!桌頂有留一碗公雞酒,煞煞去手洗洗啊,趕燒食啦!」𠊎就知了!阿姆一等惜𠊎,有好食个東西一定會留分𠊎食,還好哦!講著煮食阿姆項項會、項項曉,每年一到清明阿姆就會打紅粄艾粄五月節會包粄粽、焿粽,中元打粢粑過年甜粄發粄菜頭粄學校下課轉來,阿姆會烰甜粄分𠊎摎老妹老弟食,大家坐在門碫下,你一口、𠊎一口,該種甜甜个滋味,到這下想著還會流口涎。四炆四炒係阿姆手路菜,就因為阿姆个好手藝莊頭莊尾个叔公阿伯最好來屋下打鬥敘阿公泡茶人客阿姆會煲爌肉,做好食个「客家炒肉」、「豬腸薑絲」分大家緊食打嘴鼓大人在廳下鬧揌揌,歸陣細人仔就在大禾埕踢銅笐仔、跳索仔、無到半夜煞棚阿姆手路菜𠊎乜加減有學兜仔,每擺放學時節,𠊎會去灶下阿姆𢯭煮食看著屋下人食到笑咪咪仔,𠊎乜感覺當歡喜

發表迴響

你的電子郵件位址並不會被公開。 必要欄位標記為 *